SEVOL-LI?

Valasotikos dö kuliv pöpedik

Roul hiela 'John Travolta' in televidasökod "Benokömö lomo, o 'Kotter'" rigiko no älabon nemi 'Vinnie Barbarino', ab 'Eddie Barbarini'.

Sevol, das hiel 'Ben Savage' äpledom rouli hiela 'Cory Matthews' in televidasökod "Hipul seivom voli", ab sevol-li, das nem jenöfik hiela 'Cory' binon 'Cornelius'? Nu sevol.

Hiel 'Walter Murphy', kel enoatädom musigi pro yel balid televidasökoda"Jiel 'Buffy' vampirideiflapan", famom demü sirkot okik stülü el 'disco' ela 'symphonie' lulid fa hiel 'Beethoven' in bioskop "Fif Zädelaneitik".

In näijenot gölik televidasökoda "M*A*S*H", jimatan Konulana 'Blake' panemof 'Mildred', ab in näijenots latikum panemof 'Lorraine'. Latikumo jimatan Konulana 'Potter' panemof 'Mildred'.

Yunans in bioskop "Sevob utosi, keli ädunol ähitüpo" golons len Jol ela 'Dawson'. Bioskopi epenom hiel 'Kevin Williamson', kel id ejafom televidasökodi "Bluk hiela 'Dawson'".

In "Patanäijenot di 'Halloween' mälid elas 'Simpson'", hiel 'Martin' drimöl konyugom värbi Latänapükik: "morire 'deadön'; morit 'deadom, deadof, deadon'", e hiel 'Willie' sagom: " moris 'ol deadol!'" Balido, leod konyuga dobon; kiöpo binon obafom? Telido (e veütikumo), foms ekonyugöl it dobons. Värb at binon deponen! Kludo, foms verätik binons: morî 'deadön'; morior 'deadob'; moreris (u morere) 'deadol'; moritur 'deadom, deadof, deadon'; e ret. "Magivan Latänapüka" kion!

Kreditalised pro televidasökod "Grup lula" nünon, das tiädalid panemon "Closer to Five" (Volapüko: "Nilumo lule"), ab tiäd verätik binon "Closer to Free" (Volapüko: "Nilumo libik").

In tradutod Deutänapükik däsinotabioskopa "Mulan" di 'Disney', vög jiela 'Mulan' binon vög jiela 'Cosma Shiva Hagen', kel binof daut jikanitana 'Nina Hagen'. El 'Nina' it äbinof vögan jiela 'Sally' in bioskop "Kojmar bü kritid".

El 'A. J.' in nem jiela 'A. J. Langer' televidasökodas "Lif sonemik oba" e "Binos äsä, sevol..." sinifon 'Allison Joy'.

Els 'Wookie' ed els 'E. T.' binons in senät repüblika in bioskop "Stelakrigs - Näijenot balid: Täd magälik".

Ven jiel 'Jennifer Love Hewitt' älabof bäldoti degkil, ädajönof oki in magodakasät "Danüdolsöd! Kopimufam ko jiel 'Barbie'". Kanits fa el 'Love' i pägebons in magodakasät at.

Sirkot balid, keli kanitan 'Ricky Martin' föro äremom, äbinon "Escape" (Volapüko: "Fug") fa musigagrup 'Journey'.

Ladet jiela 'Buffy Summers' e mota okik in zif 'Sunnydale' binon '1630 Revello Drive'.

Büä mot "jipulas kil vemo jönikas" ematikof ko hiel 'Mike Brady', pinemof 'Carol Martin'.

Klänaganetan 99 di 'CONTROL' pänemof 'Susan Hilton'.

Alan sevon, das hiel 'George Clooney' äpledom sanani in televidasökod dramatik "ER". Ab äsevol-li, das id äpledom sanani in televidasökod fredadramatik, kel pänemon "E/R"?

In el 'pilot' televidasökoda "M*A*S*H", nem kultana binon Pädan 'John Mulcahy' (päplösenöl fa hiel 'George Morgan'), no Pädan 'Francis Mulcahy' (latikumo päplösenöl fa hiel 'William Christopher').

Famül 'Simpson' lödons ladetü '742 Evergreen Terrace' in zif 'Springfield', e telefonanum onsik binon: KL5-3226.

Hiel 'Thurl Ravenscroft', kel äkanitom in däsinotabioskop "Vio el 'Grinch' ätifom kritidi", binom i vög tigrida 'Tony' in televidanunams pro grenaflogs 'Frosted Flakes' fa fiam 'Kellogg'.

Nem daifetafiama 'Haribo' binon brefükam de nem datuvana Gumaberas: hiel 'Hans Riegel' de zif 'Bonn'.

In televidasökod "Dinosaurs", nem famüla: 'Sinclair' e nem vobacifa: 'Richfield' binons nems leülafiamas. (E sümbol fiama 'Sinclair' äbinon el 'dinosaur'!) I lemot 'Ethyl' ägetof nemi okik de bänsinasot.

Jiel 'Dawn Lyn', kel äpledof rouli ela 'Dodie' in televidasökod "Sons kil obik", binof sör kanitan-dramatana, hiela 'Leif Garrett'.

Jiel 'Molly Ringwald' äbinof liman dramatanefa ün yel balid televidasökoda "Jens lifa".

Jiel 'Jenna Elfman', stelan televidasökoda "Jiel 'Dharma' e hiel 'Greg'", binof lüsör hiela 'Danny Elfman', noatädan, kanitan, e fümükan musigagrupa 'Oingo Boingo'.

Pals bofik in televidasökod "Sül velid" äbinons in bioskops sökoda "Stelatäv". Hiel 'Stephen Collins', kel pledom rouli ela 'Eric Camden', äbinom käpten 'Decker' in "Stelatäv: Bioskop", e jiel 'Catherine Hicks', kel pledof rouli ela 'Annie Camden', äbinof el 'Gillian Taylor' in "Stelatäv 4id: Lomiovegam".

Yüm kisotik dabinon-li vü "Jiel 'Buffy' vampirideiflapan" e jikanitan 'Dolly Parton'? Läd 'Parton' binof balan stabanas fiama 'Sandollar', kel prodon televidasökodi (ed i bioskopi rigik).

In bioskop "Hiel 'Indiana Jones' e krodagoläd lätik", el 'Indy' äselivükom träpi, bi ätridom tonati 'J' pla tonat 'I', eglömöl, das "Latänapüko nem 'Jehovah' paprimon me tonat 'I'". Atos binon tatikälik. Nem 'Jehovah' päprimon me tonat 'I' Latänapüko, bi lafab Latänapükik no äninädon tonati 'J', kel latikumo pämekon ad sinifön eli 'I' konsonatik.

Hiel 'Grant Goodeve' äpledom rouli balidsona 'David' in televidasökod "Jöl binons saidiks", ab no in el 'pilot'. El 'David' rigiko päplösenöm fa hiel 'Mark Hamill'!

Hiel 'Morgan Freeman' äbinom "Easy Reader" (Volapüko: "Reidan takedik") in televidasökod "Kompenät lektinik".

Nem veratik hiela 'Shaggy' (flen ela 'Scooby Doo') binon 'Norville Rogers'. Vögi omik äplösenom programageidan sökoda "Foldeg geilikün Lamerikänik", hiel 'Casey Kasem'.

Mot jidramatana 'Liv Tyler' binof el 'Bebe Buell', Lädül Novula di "Playboy" ün yel 1974.

Els "Dingoes Ate My Baby" (Volapüko: "Dogs natädik efidons putüli obik"), musigagrup hiela 'Oz' in televidasökod "Jiel 'Buffy' vampirideiflapan", egetons nemi onsik de sag jiela 'Meryl Streep' in bioskop "Luvokäd in dag".
Els "Nerf Herder" (Volapüko: "Galedan elas 'nerf'"), kels pledons tiädamusigi pro sökod at, egetons nemi onsik de bioskop "Lampörän geflapon"; so Ledaut 'Leia' änemof hieli 'Han Solo'.

Jiel 'Alicia Witt' bioskopa "Konäd zifik" e televidasökoda "Jiel 'Cybill'" ädajonof oki in bioskop balidnaedo laböl bäldoti yelas vel. Äpledof rouli jiela 'Alia' in bioskop "El 'Dune'".

Mekans televidasökoda "Stelatäv" rigiko ädesirons hieli 'Martin Landau' pro roul Söla 'Spock', keli hiel 'Leonard Nimoy' ägetom. Latikumo, ven el 'Landau' älüvom televidasökodi "Lesed: nemögik", el 'Nimoy' äplaädom omi.

Jiel 'Holly Robinson Peete' (televidasökodas "Bunasüt nüm 21" e "Lagöl ko Söl 'Cooper') binof daut hiela 'Matt Robinson', el 'Gordon' rigik in televidasökod "Süt ela 'Sesame'".

In bioskop "Jiel 'Barbarella'", hiel 'Dildano' ägebom vödamali: "Llanfairpwllgwyngyllgogerychwyrndrobwll-llandysiliogogogoch". Atos binon nem veratik vilaga in Velsän.

Plödataledans in televidasökod "Els 'Simpson'" panemons 'Kang' e 'Kodos'. Nems bofik äkömons de televidasökod "Stelatäv". Hiel 'Kang' äbinom lebüdan di 'Klingon' in näijenot "Del pijuna", e hiel 'Kodos' (ko näinem "Cödetadeidan") äbinom dugan kolunäna su planet 'Tarsus IV' in näijenot "Konsien rega".

Esäkol-li oli, kisi sinifon tiäd lida "YYZ" fa musigagrup 'Rush'? "YYZ" binon sümbol kiltonatik pro flitapof di 'Toronto'.

Hiel 'Matt Groening' änemom elis 'Simpson' - hieli 'Homer' e jielis 'Marge', 'Lisa' e 'Maggie' - ma pals e sörs okiks. Nem hiela 'Bart' binon votafomam vöda Linglänapükik: 'brat' (Volapüko: cil badik). Primatonat 'J' in nems 'Homer J. Simpson' e 'Bartholomew J. Simpson' äkömon de däsinotafigurs fa hiel 'Jay Ward': hiels 'Rocket J. Squirrel' e 'Bullwinkle J. Moose'.

Jiel 'Xena', krigan-ledaut, ämutof lifön vemo lunüpo. In televidasökod eseivof hieli 'Homeros', kel älifom za yelis zültum bü Kristus, e hieli 'Julius Caesar', kel ädeadom ün yel foldegfolid bü Kristus.

Elogob jevodanis fol Dasevädükama, e panemons 'Tinky Winky', 'Dipsy', 'Laa-Laa' e 'Po'.

Äsevol-li, das famans at binons licina Larmeniyänik?
(1) Jiel 'Cher'. Kanitan e bioskopadramatan egaenöl eli 'Oscar', kela nem valik äbinon 'Cherilyn Sarkisian LaPierre', binof Larmeniyänik lafik.
(2) Hiel 'Mike Connors'. Televidadramatan, kel äpledom rouli ela 'Mannix', pemotom ko nem 'Krikor Ohanian'.
(3) Hiel 'David Seville'. Noatädan lida "The Witch Doctor" (Volapüko: "Medinaman") e jafan elas 'Chipmunk' penemöl rigiko 'Ross Bagdasarian'.
(4) Hiel 'Seymour Skinner'. Elärnobs in näijenot 180id televidasökoda "Els 'Simpson'", das räktoran stabajula ela 'Springfield' no binom el 'Seymour Skinner' veratik, ab flenädan omik de krig in Vietnamän, el 'Armen Tamzarian'.

Mens mödik kredons, das jiel 'Zsa Zsa Gabor' äbinof in televidasökod "Feilaläneds grünik". Nö! Rouli ela 'Lisa Douglas' äpledof sör ofik, el 'Eva Gabor'.

Balan jikanitanas pro däsinotatelevidasökod "Jiels 'Josie' e 'Pussycats'" pänemof: 'Cherie Moore'. Atos äbinon magälanem jiela 'Cheryl Stoppelmoor', kel latikumo äfamikof ön matanem okik: 'Cheryl Ladd'. Läd 'Ladd' id epübof mikrodagrufilasirkotis tel ön nem okik, tiädü "Cheryl Ladd" e "Dance Forever" (Volapüko: "Danüdolöd laiduliko").

In näijenot balid televidasökoda "Kronigs hiela 'Seinfeld'" (latikumo balugiko "Seinfeld"), nilädan hiela 'Jerry' pänemom no 'Kramer', ab 'Kessler'.

Hiel 'Kevin Williamson' suvo reklamom bioskopi omik, "Sevob utosi, keli ädunol ähitüpo", in televidasökod "Bluk hiela 'Dawson'", keli id äjafom. Plakats pro bioskop binons in magodakasätabailöp, in kladacem bioskopava, ed in slipacem hiela 'Dawson'. Ed in näijenot "Jek", pesedöl tü 1998 mayul 5, hiel 'Dawson' e jiel 'Joey' logons bioskopi at medü magodakasät.

Väläb rigik pro roul hiela 'Rick Blaine' in bioskop "Casablanca" äbinom hiel 'Ronald Reagan'!

In televidasökod "Stelatäv: Stajon dibolevalik nüm zül", zänodanem käptena 'Benjamin Sisko' binon 'Lafayette'.

Hiel 'Sean Ono Lennon' pemotom ün 1975 tobul 9: motedadel kildeglulid fata omik, hiela 'John Lennon'.

Jidramatan 'Jennifer Love Hewitt' (televidasökoda "Grup lula") pemekof sirkotülis tel ün yels 1995-96 pro sirkotafiam 'Atlantic', tiädü "Let's Go Bang!" (Volapüko: "Mekobsös eli 'bang'!") e "Jennifer Love Hewitt". Ab ün yel 1992, bäldotü yels degkil, pemekof sirkotüli pro sirkotafiam Yapänik 'Meldac' tiädü "Love Songs" (Volapüko: "Löfalids" u "Lids jiela 'Love'"; tiäd binon vödapled). Su sirkotül binon lid tiädü "Bedtime Stories" (Volapüko: "Slipatimakonots"), penoatädöl fa jiel 'Debbie Gibson', kel i äkanitof pödagluno.

In näijenot balid sökoda "Nisul hiela 'Gilligan'", hiel 'Jonas Grumby' (käpten törabota 'S. S. Minnow'), hiel 'Gilligan' (donafizir olik), Söl e Läd 'Howell' (balionans), hiel 'Roy Hinkley' (profäsoran), jiel 'Ginger Grant' (bioskopadramatan) e jiel 'Mary Ann Summers' (länädavomül) änafädons su nisul nesevädik. Ab etos binon in el 'pilot' perevidöl. Näijenot rigiko ädifon. Pla profäsoran päplösenöl fa hiel 'Russell Johnson' äbinom gümnadatidal päplösenöl fa hiel 'John Gabriel'. E pla jiels 'Ginger' (Tina Louise) e 'Mary Ann' (Dawn Wells) äbinofs jisekretans pänemöl 'Ginger' e 'Bunny', päplösenöl fa jiels 'Kit Smythe' e 'Nancy McCarthy'. Nitediküno, pla tiädalid famik el 'pilot' balid älabon tiädalidi vemo difiki modü el 'calypso'!

Jidramatan 'Pamelyn Ferdin' (kel ädajonof oki in televidasökod ti alik ün degyels 1960 latik e 1970 gölik) binof nu malädanakälan e komipan pro nimagitäts.

Balan krigafanäbas in televidasökod "Heroedans hiela 'Hogan'" äbinom Donafizir 'Carter', splodastöfasevan ze stupik, päplösenöl fa hiel 'Larry Hovis'. Ab roul Söla 'Hovis' in näijenot balid (el 'pilot') äbinon Liötan 'Carter'.

Nem veratik jidramatana 'Jane Seymour' binon el 'Joyce Penelope Wilhelmina Frankenberg'.

"Riskädö, o 'Will Robinson'!" In el 'pilot' rigik televidasökoda "Paperöl in leval", famül 'Robinson' no älabon eli 'robot', e no äbinom ketävan peklänedöl su levalanaf. Sökodi at nen el 'robot' e nen Dokan 'Zachary Smith' kanob bepenön me vöds kil: naütik, naütik, naütik! Läbo el 'pilot' nulik pämekon!

If binol vom jönik e selibik, bäldotü yels degjöl jü kildeglul, penolöd obe!

Revidot nulikün: 2002 mäzul 26
Dabükot balid: 1998 febul 21
Tikamagot e jenöfükam fa hiel 'Arden R. Smith' (erilaz@earthlink.net)

* Lomapad * Donatiäds * Drims svidik * Fotografotalabun * Löfäbs * Sevol-li? * Silanans hiela 'Charlie' * Sirkotakomands * Tuvots vönotavik * Potakads Volapükik * Volapükayüms *